- 60వ డివిజన్లో ఘనంగా అంగన్వాడీ బడి బాట కార్యక్రమం
- ముఖ్య అతిథిగా పాల్గొన్న కార్పొరేటర్ బీమా శ్రీవల్లి
- విద్యతో పాటు పౌష్టికాహారం అందిస్తున్న అంగన్వాడీ కేంద్రాలు
- గర్భిణీలు, బాలింతల ఆరోగ్య సంరక్షణలో అంగన్వాడీల కీలక పాత్ర
- బడిబాట కార్యక్రమంతో తల్లిదండ్రుల్లో అవగాహన
- ప్రభుత్వ సేవలను సద్వినియోగం చేసుకోవాలని సూచన
భద్రాద్రి జిల్లా బ్యూరో, జూన్ 08 (వార్త సంధ్య) : కొత్తగూడెం మున్సిపల్ కార్పొరేషన్ పరిధిలోని 60వ డివిజన్లో సోమవారం అంగన్వాడీ టీచర్ల ఆధ్వర్యంలో “అంగన్వాడీ బడి బాట” కార్యక్రమాన్ని ఘనంగా నిర్వహించారు. చిన్నారులను అంగన్వాడీ కేంద్రాల్లో చేర్పించి వారి విద్యా, ఆరోగ్యాభివృద్ధికి బాటలు వేయాలనే లక్ష్యంతో ఈ కార్యక్రమాన్ని చేపట్టారు. కార్యక్రమానికి 60వ డివిజన్ కార్పొరేటర్ బీమా శ్రీవల్లి ముఖ్య అతిథిగా హాజరై ప్రారంభించారు. ఈ సందర్భంగా కార్పొరేటర్ బీమా శ్రీవల్లి మాట్లాడుతూ, చిన్నారుల జీవితంలో తొలి అడుగు అంగన్వాడీ కేంద్రాల నుంచే ప్రారంభమవుతుందని అన్నారు. బాల్యంలోనే విద్య, క్రమశిక్షణ, సామాజిక విలువలు అలవడేలా అంగన్వాడీ కేంద్రాలు కీలక పాత్ర పోషిస్తున్నాయని పేర్కొన్నారు. రెండు సంవత్సరాల వయస్సు నుంచే పిల్లలను అంగన్వాడీ కేంద్రాలకు పంపించడం ద్వారా వారి మానసిక, శారీరక వికాసానికి తోడ్పడుతుందని వివరించారు. అంగన్వాడీ కేంద్రాల్లో పిల్లలకు ప్రాథమిక విద్యతో పాటు పౌష్టికాహారం, ఆరోగ్య పరీక్షలు, ఆటల ద్వారా అభ్యాసం వంటి అనేక సేవలు అందిస్తున్నట్లు తెలిపారు. చిన్నారుల్లో పోషకాహార లోపం తలెత్తకుండా ప్రభుత్వం ప్రత్యేక చర్యలు తీసుకుంటోందని, తల్లిదండ్రులు ఈ అవకాశాలను సద్వినియోగం చేసుకోవాలని సూచించారు. గర్భిణీలు, బాలింతల ఆరోగ్య పరిరక్షణలో కూడా అంగన్వాడీ కేంద్రాలు ముఖ్యమైన బాధ్యత నిర్వహిస్తున్నాయని ఆమె పేర్కొన్నారు. గర్భిణీ స్త్రీల ఆరోగ్య పరిస్థితులను అంగన్వాడీ సిబ్బంది ఎప్పటికప్పుడు పర్యవేక్షిస్తూ అవసరమైన సూచనలు, సేవలు అందిస్తున్నారని తెలిపారు. తల్లి ఆరోగ్యం బాగుంటేనే ఆరోగ్యవంతమైన సమాజం నిర్మాణం సాధ్యమవుతుందని అన్నారు. ప్రభుత్వం అందిస్తున్న సంక్షేమ పథకాలు, పోషకాహార కార్యక్రమాలు, ప్రీ-స్కూల్ విద్యా కార్యక్రమాలను ప్రతి కుటుంబం సద్వినియోగం చేసుకోవాలని ఆమె కోరారు. తమ పిల్లలను అంగన్వాడీ కేంద్రాలకు పంపించి వారి భవిష్యత్తుకు బలమైన పునాది వేయాలని తల్లిదండ్రులకు పిలుపునిచ్చారు. ఈ సందర్భంగా అంగన్వాడీ టీచర్లు ఇంటింటికీ వెళ్లి చిన్నారుల నమోదు, అంగన్వాడీల ప్రాధాన్యత, ప్రభుత్వం అందిస్తున్న సేవల గురించి ప్రజలకు అవగాహన కల్పించారు. బడి బాట ర్యాలీలో చిన్నారులు, తల్లిదండ్రులు, మహిళలు ఉత్సాహంగా పాల్గొన్నారు. ఈ కార్యక్రమంలో అంగన్వాడీ టీచర్లు, ఆశా కార్యకర్తలు, స్థానిక నాయకులు, మహిళలు, తల్లిదండ్రులు, చిన్నారులు తదితరులు పాల్గొన్నారు. కార్యక్రమం విజయవంతంగా నిర్వహించినందుకు అంగన్వాడీ సిబ్బందిని కార్పొరేటర్ అభినందించారు.