మిగిలిన నాలుగు ఎకరాల భూమిని కాపాడాలి
రూ.19 కోట్ల రుణం వ్యవహారంపై విచారణ జరపాలి
మంత్రి తుమ్మల వెంటనే స్పందించాలి
తెలంగాణ రక్షణ సేన చీఫ్ కల్వకుంట్ల కవిత డిమాండ్‌
హైదరాబాద్‌, అక్టోబర్‌ 9 (వార్త సంధ్య):
చిత్రపురి కాలనీ సొసైటీలో చోటుచేసుకున్నాయని ఆరోపిస్తున్న అవినీతి, అక్రమాలపై కేంద్ర దర్యాప్తు సంస్థలైన సీబీఐ, ఈడీతో సమగ్ర విచారణ జరిపించాలని తెలంగాణ రక్షణ సేన చీఫ్ కల్వకుంట్ల కవిత డిమాండ్‌ చేశారు. సినీ కార్మికుల సంక్షేమం కోసం కేటాయించిన భూములు, ఇళ్ల కేటాయింపుల్లో అక్రమాలు జరిగాయన్న ఆరోపణలపై ప్రభుత్వం తక్షణమే స్పందించాలని కోరారు. కాలనీలో మిగిలి ఉన్న నాలుగు ఎకరాల భూమి అన్యాక్రాంతం కాకుండా కాపాడి, అర్హులైన సినీ కార్మికులకు ఇళ్ల నిర్మాణం కోసం వినియోగించాలని సూచించారు.
చిత్రపురి కాలనీ సాధన సమితి నాయకులతో కలిసి శుక్రవారం ఆమె మీడియాతో మాట్లాడారు. ఫిల్మ్‌ ఫెడరేషన్‌ అధ్యక్షుడిగా ఉన్న అనిల్‌పై పలు అవినీతి, అక్రమాల ఆరోపణలు ఉన్నాయని పేర్కొంటూ, వాటిపై నిష్పక్షపాతంగా విచారణ జరిపించాలని డిమాండ్‌ చేశారు. గత బీఆర్‌ఎస్‌ ప్రభుత్వ హయాంలో కొందరు మంత్రుల సహకారంతో అక్రమాలు జరిగాయన్న ఆరోపణలు ఉన్నాయని తెలిపారు. ఎన్నికల సమయంలో అక్రమాలపై చర్యలు తీసుకుంటామని హామీ ఇచ్చిన కాంగ్రెస్‌ ప్రభుత్వం ఇప్పటివరకు ఎందుకు స్పందించలేదని ప్రశ్నించారు.
నాలుగు ఎకరాల భూమిపై వివాదం
సినీ కార్మికులకు ఇళ్ల స్థలాలు కల్పించాలనే ఉద్దేశంతో అప్పటి ముఖ్యమంత్రి కోట్ల విజయభాస్కర్‌ రెడ్డి, నటుడు ప్రభాకర్‌ రెడ్డి చొరవతో 1994లో చిత్రపురి కాలనీకి 67 ఎకరాల భూమి కేటాయించారని కవిత గుర్తుచేశారు. ఈ భూములపై, కార్మికులకు ఇళ్ల కేటాయింపు ప్రక్రియలో గత బీఆర్‌ఎస్‌ ప్రభుత్వ పదేళ్ల పాలనలో భారీగా అవినీతి జరిగిందని ఆమె ఆరోపించారు.
ప్రస్తుతం కాలనీలో మిగిలి ఉన్న నాలుగు ఎకరాల భూమిపై అక్రమ ప్రయత్నాలు జరుగుతున్నాయని, కోఆపరేటివ్‌ సొసైటీ నిబంధనలను ఉల్లంఘించి ఆ భూమిని తనఖా పెట్టి రూ.19 కోట్ల రుణం తీసుకున్నారని కవిత ఆరోపించారు. తాజాగా అదే భూమిలో ఫ్లాట్లు నిర్మిస్తామంటూ ప్రచారం చేస్తున్నారని విమర్శించారు. ఈ వ్యవహారంపై సంబంధిత శాఖలు వెంటనే దర్యాప్తు చేపట్టి, భూమి లావాదేవీలకు సంబంధించిన వివరాలను ప్రజలకు వెల్లడించాలని డిమాండ్‌ చేశారు.
సహకార శాఖ మంత్రి తుమ్మల నాగేశ్వర్‌రావు ఈ వ్యవహారంపై తక్షణమే స్పందించాలని కోరారు. వివాదాస్పదంగా మారిన భూమిని కాపాడి, పేద సినీ కార్మికులకు ఇళ్ల నిర్మాణం కోసం వినియోగించేలా చర్యలు తీసుకోవాలని సూచించారు.
అనిల్‌ను పదవి నుంచి తొలగించాలి
ఫిల్మ్‌ ఫెడరేషన్‌ అధ్యక్షుడిగా ఉన్న అనిల్‌ను వెంటనే తొలగించాలని ముఖ్యమంత్రి రేవంత్‌రెడ్డిని కవిత డిమాండ్‌ చేశారు. ఫ్లాట్ల వ్యవహారంతో పాటు ఇళ్ల సముదాయాలకు సంబంధించిన వివిధ అంశాల్లో రూ.23 కోట్లు, రూ.10 కోట్లు అంటూ వసూళ్లకు పాల్పడ్డారన్న ఆరోపణలు ఉన్నాయని పేర్కొన్నారు. ఈ ఆరోపణలపై సమగ్ర విచారణ జరిపించాలని కోరారు.
ఇటీవల జూబ్లీహిల్స్‌ ఉప ఎన్నికల సమయంలో ముఖ్యమంత్రి రేవంత్‌రెడ్డి సభ నిర్వహణ కోసం సొసైటీ సభ్యుల నుంచి రూ.2 లక్షలు వసూలు చేశారని, ఆదివారం జరగనున్న సీఎం సభ కోసం మరో రూ.2 లక్షలు అడుగుతున్నారని కవిత ఆరోపించారు. ఈ ఆరోపణలపై సంబంధిత వ్యక్తులు, అధికారులు స్పందించి వాస్తవాలను వెల్లడించాల్సిన అవసరం ఉందన్నారు.
సీనియర్‌ దర్శకుడు తోట రామకృష్ణకు కేటాయించిన ఇంటిని మరొకరికి విక్రయించారన్న ఆరోపణను కూడా ఆమె ప్రస్తావించారు. బాధితులు ప్రశ్నిస్తే బెదిరింపులకు పాల్పడుతున్నారని పేర్కొంటూ, పోలీసులు ఎందుకు చర్యలు తీసుకోవడం లేదని ప్రశ్నించారు.
ఆదివారం జరిగే సభలో ముఖ్యమంత్రి చిత్రపురి కాలనీకి రూ.10 కోట్లు కేటాయిస్తారని ప్రచారం జరుగుతోందని పేర్కొన్న కవిత, ఆ మొత్తాన్ని అనిల్‌ ద్వారా కాకుండా ఫిల్మ్‌ ఫెడరేషన్‌ కార్పొరేషన్‌కు కేటాయించాలని సూచించారు. ప్రస్తుత కాలనీలో భూమి విలువ సుమారు రూ.7 వేల కోట్లు ఉంటుందని ఆమె అంచనా వ్యక్తం చేశారు. ఇంత విలువైన భూముల వ్యవహారంలో ఆరోపణలు ఎదుర్కొంటున్న వారిపై చర్యలు ఎందుకు తీసుకోవడం లేదని ప్రభుత్వాన్ని నిలదీశారు.
సినీ ప్రముఖులు జోక్యం చేసుకోవాలి
కష్టపడి సంపాదించిన డబ్బుతో ఇళ్లు కొనుగోలు చేసిన సినీ కార్మికులకు అన్యాయం జరగకుండా సినీ పరిశ్రమ ప్రముఖులు జోక్యం చేసుకోవాలని కవిత కోరారు. చిరంజీవి, పవన్‌ కల్యాణ్‌, సురేశ్‌బాబు, దిల్‌ రాజు వంటి ప్రముఖులు ఈ సమస్యపై స్పందించాలని విజ్ఞప్తి చేశారు.
అలాట్‌మెంట్‌ కమిటీలో ఉన్న కాంగ్రెస్‌కు చెందిన పీవీ శ్రీనివాస్‌ సతీమణికి ఇల్లు కేటాయించారని ఆమె ఆరోపించారు. అలాట్‌మెంట్‌ కమిటీలో సభ్యురాలిగా ఉన్న వ్యక్తికి ఇల్లు ఎలా కేటాయించారని ప్రశ్నించారు. అదే కమిటీలో ఉన్న సుద్దాల అశోక్‌ తేజ కూడా చిత్రపురి కాలనీలో జరుగుతున్న పరిణామాలపై స్పందించి, వాస్తవాలను వెల్లడించాలని కోరారు.
మరో రెండేళ్లలో తమ పార్టీ అధికారంలోకి వస్తుందని, అప్పుడు సినీ కార్మికులకు న్యాయం చేస్తామని కవిత హామీ ఇచ్చారు. చిత్రపురి కాలనీలో బాధితులకు న్యాయం జరిగే వరకు వారితో కలిసి పోరాటం చేస్తామని స్పష్టం చేశారు.
ఈ సమావేశంలో చిత్రపురి కాలనీ సాధన సమితి అధ్యక్షుడు డాక్టర్‌ కస్తూరి శ్రీనివాస్‌, సుధీర్‌ కలగర, రవీంద్రనాథ్‌ ఠాగూర్‌, తోట హరిత, రామ్‌ చల్ల, లక్ష్మీనారాయణ తదితరులు పాల్గొన్నారు.