నేడు ప్రపంచ స్నేహితుల దినోత్సవం ప్రత్యేకం
నాగప్రసాద్ జిల్లా బ్యూరో, ఆగస్టు 02 (వార్త సంధ్య) : మనిషి జీవితంలో కుటుంబ సభ్యుల తర్వాత అత్యంత విలువైన బంధం స్నేహం. రక్తసంబంధం కాకపోయినా హృదయాలను కలిపే స్వచ్ఛమైన అనుబంధమే నిజమైన స్నేహం. ఎలాంటి స్వార్థం, షరతులు లేకుండా ఒకరికి ఒకరు అండగా నిలవడం, కష్టసుఖాల్లో తోడుగా ఉండడం స్నేహం గొప్పతనం. ప్రస్తుత వేగవంతమైన జీవితంలో మానసిక ఒత్తిడి, ఆందోళన, ఒంటరితనం వంటి సమస్యలు పెరుగుతున్నాయి. అలాంటి సమయంలో మన భావాలను అర్థం చేసుకుని, మనసులోని బాధను పంచుకునే ఒక నమ్మకమైన స్నేహితుడు ఉంటే ఎంతో ఉపశమనం లభిస్తుంది. నిజమైన స్నేహం మనిషిలో ఆత్మవిశ్వాసాన్ని పెంచి, జీవితాన్ని సంతోషంగా ముందుకు నడిపించే శక్తిని ఇస్తుంది. “మంచి పుస్తకం వందమంది స్నేహితులతో సమానం… కానీ ఒక మంచి స్నేహితుడు ఒక గ్రంథాలయంతో సమానం” అనే మాట స్నేహం విలువను తెలియజేస్తుంది. జీవితంలో ఎదురయ్యే ప్రతి క్లిష్ట పరిస్థితిని ఎదుర్కొనే ధైర్యం మనలోనే ఉంటుంది. ఆ శక్తిని వెలికితీసేది ఆత్మవిశ్వాసం, దానికి బలం చేకూర్చేది మంచి స్నేహితుడే. జీవితం శాశ్వతం కాదని రాలే ఆకు చెబుతుంది. ఒక్కరోజైనా గౌరవంగా జీవించాలని వికసించే పువ్వు గుర్తు చేస్తుంది. ఇతరులకు నీడనిస్తూ ఎదిగే వృక్షం మనకు సేవాభావాన్ని నేర్పుతుంది. అలాగే మంచి స్నేహం మనిషిలో మానవత్వాన్ని, పరస్పర గౌరవాన్ని పెంపొందిస్తుంది. స్నేహితుడిగా ఉండటం అంటే కేవలం ఆనందాలను పంచుకోవడం మాత్రమే కాదు. బాధలో ఉన్నప్పుడు “నేను ఉన్నాను” అని ధైర్యం చెప్పడం, వారి మాటలను శ్రద్ధగా వినడం, వారు మనపై ఉంచిన నమ్మకాన్ని కాపాడటం కూడా స్నేహమే. ప్రతి సమస్యకు పరిష్కారం చెప్పలేకపోయినా, ఒకరి బాధను అర్థం చేసుకుని వారి రహస్యాలను గౌరవించడం గొప్ప సహాయం. నమ్మకాన్ని సంపాదించడం చాలా కష్టం. కానీ దాన్ని కోల్పోవడానికి ఒక్క క్షణమే చాలు. అందుకే స్నేహంలో నిజాయితీ, విశ్వాసం, పరస్పర గౌరవం ఎల్లప్పుడూ నిలిచి ఉండాలి. ప్రపంచ స్నేహితుల దినోత్సవం సందర్భంగా ప్రతి ఒక్కరూ తమ జీవితంలో విలువైన స్నేహితులను గుర్తు చేసుకుని, ఆ బంధాన్ని మరింత బలపరచుకోవాలి. ఎందుకంటే నిజమైన స్నేహం జీవిత ప్రయాణంలో ఎప్పటికీ చెదరని అమూల్యమైన సంపద.